Isa 8 | NdeIBE | STEP | UJehova wathi kimi, “Thatha iphepha elikhulu eligoqiweyo ulobe kulo ngolimi olujwayelekileyo ukuthi: Maheri-Shalali Hashi-Bhazi (okutsho ukuthi: abaphanga ukuhuquluza okuphangiweyo).

Isaiah 8

I-Asiriya Iba Yisandla SikaJehova

1 UJehova wathi kimi, “Thatha iphepha elikhulu eligoqiweyo ulobe kulo ngolimi olujwayelekileyo ukuthi: Maheri-Shalali Hashi-Bhazi (okutsho ukuthi: abaphanga ukuhuquluza okuphangiweyo). 2 Ngizabiza u-Uriya umphristi loZekhariya indodana kaJeberekhiya njengofakazi bami abathembekileyo.”

3 Ngemva kwalokho ngaya kumphrofethikazi, wathatha isisu, wazala indodana. UJehova wasesithi kimi, “Mbize ngokuthi nguMaheri-Shalali-Hashi-Bhazi. 4 Kuzakuthi umfana engakakwazi ukuthi ‘ubaba’ loba ‘umama’, inotho yaseDamaseko lempahla ethunjwe eSamariya kuzathathwa yinkosi yase-Asiriya.”

5 UJehova wakhuluma kimi futhi wathi:

6 “Ngenxa yokuthi abantu laba sebewalile amanzi ageleza kuhle aseShilowa bethokozela uRezini lendodana kaRemaliya,

7 ngakho-ke uJehova useduze ukubalethela izikhukhula ezilamandla ezamanzi oMfula – inkosi yase-Asiriya lobukhosi bayo bonke. Azachithekela ngaphandle kwayo yonke imigelo yawo, ageleze phezu kwamakhumbi ayo wonke,

8 afohlele koJuda, agcwale kulo, adlule phakathi kwalo efika entanyeni. Izimpiko zawo ezeluliweyo zizakwembesa ububanzi belizwe lakho, Awu, Imanuweli!”

9 Hlabani umkhosi wempi lina zizwe, lichithwe! Lalelani lonke lina mazwe akude. Lungiselani impi, lichithwe! Lungiselani impi lichithwe!

10 Lungisani icebo lenu, kodwa liza fojiswa: tshonini isu lenu, kodwa kaliyikuma, ngoba uJehova ulathi.

Mesabeni UJehova

11 UJehova wakhuluma kimi isandla sakhe esilamandla siphezu kwami, engixwayisa ukuba ngingalandeli indlela yalababantu. Wathi:

12 “Ungabokuthi kungamacebo amabi konke abantu laba abathi kungamacebo amabi; ungakwesabi abakwesabayo njalo ungakuqhuqhi.

13 UJehova uSomandla nguye okumele limazi engongcwele, nguye okumele limesabe, nguye okumele limqhuqhe.

14 njalo uzakuba yisiphephelo; kodwa kuzo zombili izindlu zako-Israyeli uzakuba yilitshe abantu abazakhubeka kulo ledwala elizabawisa. Ebantwini baseJerusalema uzakuba yisifu lomjibila.

15 Inengi labo lizakhubeka; bazakuwa bephuke, bazathiywa bathunjwe.”

16 Bopha ubufakazi, uqinise umthetho phakathi kwabafundi bami.

17 Ngizamlindela uJehova, ofihlela indlu kaJakhobe ubuso bakhe. Ngizabeka ithemba lami kuye.

18 Mina ngilapha labantwana uJehova angiphe bona. Siyizibonakaliso lezimpawu ku-Israyeli ezivela kuJehova uSomandla, ohlala entabeni iZiyoni. 19 Nxa abantu bekutshela ukuthi buza abalamadlozi labalemimoya yobuthakathi, labanyenyezayo bengunguza, kambe abantu akumelanga babuzisise uNkulunkulu wabo na? Kungani abaphilayo libabuzela kwabafayo na? 20 Emthethweni lakubo ubufakazi! Uma bengakhulumi ngokumayelana lelizwi leli, kabalakho ukukhanya kokusa. 21 Bazazula lelizwe behlulukelwe, belambile. Lapho sebephalwe yindlala, bazathukuthela, bathuke uJehova wabo loNkulunkulu wabo bekhangele phezulu.

22 Emva kwalokho bazakhangela emhlabeni babone usizi kuphela, lomnyama owesabekayo, njalo bazaphoselwa emnyameni opheleleyo.